Azərbaycan, Bakı, 2 mart / Trend , müxbir H.Vəliyev/
Regional Rabitə Birliyinin (RRB) komissiyası sentyabrın əvvəllərində Bakıda radiotezlik spektrindən istifadənin tənzimlənməsi məsələsi üzrə növbəti iclas keçirəcək.
Qərar RRB-nin radiotezlik spektrindən istifadənin tənzimlənməsi və radioelektron vasitələrinin elektromaqnit uzlaşması və RRB-nin peyk rabitəsi, televiziya və səs radioyayımı üzrə komissiyalarının birgə iclasında qəbul olunub. İclas fevralın 25-26-da Kiyevdə keçirilib.
İştirakçılar MDB ölkələri üçün radiotezliklərin paylanmasına dair ümumi cədvəlin hazırlanması, RRB rabitə administrasiyasının 2012-ci ildə keçiriləcək Ümumdünya Radiorabitə Konfransına hazırlanması, həmçinin perspektivli simsiz genişzolaqlı çıxış texnologiyasının tətbiqi məsələlərini müzakirə ediblər.
İclas iştirakçıları peyk rabitəsinin inkişafının aktual istiqamətlərinin öyrənilməsində rabitə administrasiyasının qarşılıqlı fəaliyyət aspektlərinə diqqət yetiriblər və öz ölkələrində rəqəmsal yayımın tətbiqinə dair təcrübə mübadiləsi aparıblar.
İclas zamanı Ukrayna tərəfinin təşəbbüsü ilə birlik ölkələrinin uzun və orta dalğa diapozonunda sinxron səs yayımı şəbəkəsinin radiotezlik resursunun yenidən paylanması haqqında məsələ qaldırılıb. Bu məsələnin hazırlanması üçün komissiyalar işçi qrupunun yaradılmasını qərara alıblar.