Azərbaycan, Bakı, 27 aprel /Trend, müxbir H.Vəliyev/
Azərbaycan Milli Elmlər Akademiyasının İnformasiya Texnologiyaları İnstitutu (İTİ) fərdi identifikasiya nömrələrinin alqoritmini hazırlayıb. Bu barədə İTİ-nin məlumatında bildirilir.
İnstitutun yeni işi "Əhali və miqrasiya" informasiya sisteminin müdafiəsinin təminatına yönəlib. Alqoritmin hazırlanmasında dinamik diskret sistemlərin modelləşdirilməsi üçün riyazi aparat təqbiq olunub ki, bu da çıxışın idarə olunması modelinin və sosial şəbəkələrdə şəxsi informasiyanın qarşılıqlı əlaqəsinin aşkar olunması metodunun yaradılmasına imkan verib.
Perspektivdə sistem Ədliyyə Nazirliyi tərəfindən istifadə olunan əhalinin dövlət reyestrinə inteqrasiya oluna bilər. Reyestrin funksiyalarından biri Azərbaycanın hər vətəndaşına, vətəndaşlığı olmayan şəxslərə və ölkə ərazisində daimi yaşayan əcnəbilərə unikal identifikasiya nömrəsinin (İD) verilməsidir. "Dövlət reyestri haqqında" qanuna əsasən, bu, respublikanın digər informasiya sistemlərinin məlumat bazasına daxil edilir. İD analogiyasına görə, insan haqqında informasiya dövlət strukturlarının bütün orqanları, vergi müfəttişliyi, pensiya fondu, maliyyə müəssisələri və digər instansiyalar üçün açıq olur. Sistem uçotun aparılmasına, şəxsiyyətin identifikasiyasına, həmçinin respublika ərazisində yaşayan vətəndaşlar haqqında informasiyaya çıxışın asanlaşdırılmasına imkan yaradır.
