Azərbaycan, Bakı, 18 avqust /Trend, müxbir Q.Vəliyev/
Rusiyanın aparıcı rabitə operatorlarından olan "Mobil Telesistemlər" (MTS) şirkəti öz şəbəkə abonentlərinə Azərbaycana pul köçürmələri göndərmək imkanını açıqlayıb. Bu barədə şirkətin məlumatında deyilir.
Azərbaycana pul köçürülməsi rəsmiləşdirilərkən, MTS şəbəkəsinin abonentləri komissiya məbləğini öz mobil telefonları hesabına daxil etmək imkanı yaradıb.
Şirkət Azərbaycanla yanaşı, Ermənistan, Belarus, Gürcüstan, Qazaxıstan, Moldova və Ukraynaya da pul köçürmələrinin həyata keçirilməsi imkanı yaradıb.
Abunəçi pul köçürməsini həyata keçirmək üçün pasportunu təqdim etməlidir. Pul köçürməsinin maksimal məbləğı 120 min rubl təşkil edir. Rusiya ərazisində pul köçürməsi üçün nəzərdə tutulmuş komissiya 1,5%, MDB ölkələri üçün isə 2% təşkil edir.
MTS-in pərakəndə şəbəkə direktoru Sergey Rumyansevin sözlərinə görə, pul köçürmələri üzrə proqramın üstünlüyü müştəri üçün köçürmənin rəsmiləşdirilməsi prosedurunun qısa və rahat olması, əlavə formallıqların və sənədləşməyə tələblərin olmamasıdır.
Proqramın tərəfdaşı qismində "Zolotaya Korona" pul köçürmələri sistemi çıxış edir.
