Azərbaycan, Bakı, 27 avqust /Trend, müxbir H.Vəliyev/
Azərbaycanın "Ultra" İT şirkəti İqtisadi İnkişaf Nazirliyinin elektron sənəd dövriyyəsinə "Vətəndaşların müraciətlərinə baxılması" və "Kadrların idarə olunması" modullarının tətbiqi üzrə işi başa çatdırıb. Bu barədə Trend-ə cümə günü şirkətdən bildiriblər.
"Vətəndaşların müraciətlərinə baxılması" modulu vətəndaşlara nazirliyə ərizə ilə müraciət etməyə və onların baxılmasına internet vasitəsilə müstəqil surətdə nəzarət etməyə imkan verəcək, "Kadrların idarə olunması" modulu isə kadrların peşəkarlıq səviyyəsini artıracaq. Elektron idarəetmə sistemi perspektivdə nazirliyin tabeçiliyində olan bütün strukturlar üzrə genişləndiriləcək.
Hazırda "Ultra" tərəfindən nazirliyin əməkdaşları üçün elektron sənəd dövriyyəsi ilə iş üzrə treninq və təlim kursları təşkil olunub.
Nazirlikdə həyata keçirilən layihə bütün kağız dövriyyəsinin, kadr və maliyyə uçotunun elektron şəklə salınmasını nəzərdə tutur.
Şirkət tərəfdən nazirlikdə Megapolis DocNet sistemi tətbiq olunub. Bu, ünvanlar üzrə sənədləri operativ şəkildə hazırlamağa və yaymağa imkan verir ki, bununla da insan resurslarından və kağız daşıyıcılarından istifadə azalır. Daxili korporativ səviyyədə nazirlikdə elektron-rəqəmsal imzadan da istifadə olunur.
Elektron sənəd dövriyyəsi sistemi layihəsinin Azərbaycan Maliyyə Nazirliyində və respublikanın digər idarələrində tətbiqi planlaşdırılıb.