Azərbaycan, Bakı, 8 dekabr /Trend, müxbir H.Vəliyev/
Azərbaycan ilə Türkmənistanı birləşdirən optik-lif kabel magistralının Xəzər seqmentinin çəkilişi yeni mərhələyə daxil olur. Bu barədə çərşənbə günü Rabitə və İnformasiya Texnologiyaları Nazurliyinin (RİTN) məlumatında deyilir.
Məlumata görə, məsələ bu yaxınlarda Türkmənistan və Azərbaycanın rabitə administrasiyası rəhbərləri tərəfindən müzakirə olunub, müzakirələrin yekunu olaraq hər iki ölkənin müvafiq strukturları tərəfindən layihənin həyata keçirilməsi işlərinin sürətləndirilməsi barədə qərar qəbul edilib.
Bir müddət əvvəl rabitə və informasiya texnologiyaları naziri Əli Abbasovun dediyi kimi, Azərbaycanın irəli sürdüyü və BMT tərəfindən qəbul olunmuş "Şərq-Qərb" superinformasiya magistralının yaradılmasına dair qətnamə optik-lif kabel magistralının Xəzər seqmentinin çəkilişi ilə bağlı həll olunmamış təşkilati məsələləri aradan qaldıracaq. Qəbul olunmuş qətnaməyə əsasən, region ölkələrinə bu layihənin həyata keçirilməsi üçün zəruri olan bütün tədbirlərin görülməsi tövsiyə olunub.
Azərbaycan ilə Türkmənistan arasında optik-lif kabel magistralının Transxəzər seqmentinin çəkilişi marşrutun azaldılmasına, mübadilə olunan trafikin həcminin artırılmasına və Qırğızıstan vasitəsilə Çinə birbaşa çıxışa imkan yaradır.
Layihə Azərbaycan-Türkmənistan hökumətlərarası protokoluna daxil edilib.
