Azərbaycan, Bakı, 18 yanvar /Trend, müxbir H.Vəliyev/
2010-cu ilin yekunları üzrə Azərbaycan Dövlət Radiotezliklər İdarəsinin (DRİ) Efir nəzarəti şöbəsi tərəfindən 2096 ədəd qeydiyyatsız radioelektron vasitə (REV) aşkar edilib. Bu barədə çərşənbə axşamı DRİ-nin məlumatında deyilir.
Ötən dövr ərzində DRİ tərəfindən 830 müəssisə və təşkilata texniki baxış keçirilib.
Qeydiyyatsız REV-in ümumi sayından 902 ədədi möhürlənib, 228-i satışdan çıxarılıb, 785-i qeydiyyata alınıb, yerdə qalan 181 ədədinin qeydiyyatı prosesi davam edir.
Qeydiyyatsız REV-dən istifadə edənlər barəsində 215 protokol tərtib olunub və onlarla bağlı müvafiq hüquqi tədbirlər görüləcək.
Ötən ilin yekunları üzrə Efir radiotezliklərinə nəzarət şöbəsi tərəfindən 395 radiorabitə şəbəkəsi və 1490 radiotezlik üzərində nəzarət təmin olunub.
Efir radiomübadiləsinin düzgün həyata keçirilməsi ilə əlaqədar yoxlamaların nəticələri üzrə 347 hüquq pozuntusu qeydə alınıb, bununla əlaqədar müvafiq xəbərdarlıqlar göndərilib.
İdarə tərəfindən 160 qeydiyyatsız radiotezliyin aşkar edilməsi ilə bağlı müvafiq işlər görülür.
Yanvarın 1-nə olan vəziyyətə görə, DRİ-yə 315 müəssisə və təşkilat daxildir. Onlardan 78-i dövlət, 183-ü kommersiya, 27-si xarici müəsisə, 27-si fiziki şəxsdir.
DRİ-də qeydiyyata alınan REV-in ümumi sayı yanvarın 1-nə 28 828 ədəd təşkil edir.
2010-cu ildə Dövlət Radiotezliklər Komissiyasınnı qərarına uyğun olaraq DRİ-nin Efir radiotezliklərinə nəzarət şöbəsi tərəfindən 64 müəssisəyə tezlik resursları ayrılıb, eləcə də 4609 ədəd yeni REV qeydiyyata alınıb.
Ötən il müəssisə və təşkilatlarla bağlanan müqavilələrin sayı 309 ədəd təşkil edib. 15 müəssisədən radiotezliyin qaytarılması ilə bağlı müraciət daxil olub. Dövlət Radiotezliklər Komissiyasının qərarına uyğun olaraq iki tezlik resursunun qaytarılması təmin olunub.