Azərbaycan, Bakı, 19 yanvar /Trend, müxbir H.Vəliyev/
Yanvarın 1-nə olan məlumata görə, Azərbaycanın mobil rabitə operatoru şəbəkələrində istifadə olunan abunə nömrələrinin sayı 8,9 milyon ədəd təşkil edib. Bu barədə çərşənbə günü Azərbaycan Dövlət Statistika Komitəsindən məlumat verilib.
Dövlət Komitəsinin məlumatlarına əsasən, abunə nömrələrinin ümumi sayından 7,4 milyon nömrə fəaldır. Son il ərzində respublika üzrə mobil rabitə abunəçilərinin sayı 1,2 milyon nəfər artıb.
2010-cu ildə rabitə müəssisələri tərəfindən göstərilən telekommunikasiya xidmətlərinin həcmi 1,2 milyard manat təşkil edib ki, bu da 2009-cu ilin analoji göstəricisindən 29,7 faiz çoxdur. Göstərilən rabitə xidmətinin ümumi həcmindən 74,3 faiz əhaliyə göstərilən xidmətlərin payına düşür.
Bununla yanaşı əldə olunan gəlirin 67,4 faizi mobil rabitə xidmətinin payına düşüb və bu 2009-cu ilin analoji göstəricisi ilə müqayisədə 30,2 faiz artaraq 782,6 milyon manat təşkil edib.
2010-cu ilin yanvar-noyabr aylarında Azərbaycanın rabitə müəssisələrində orta əmək haqqı 523,4 manat olan 24,4 nəfər çalışıb ki, bu da 2009-cu ilin analoji dövrü ilə müqayisədə 4,7 faiz artıb.
