Azərbaycan, Bakı, 5 may /Trend, müxbir H.Vəliyev/
İlin sonunadək Azərbaycanın mobil rabitə operatoru "Azerfon" MMC 3G şəbəkəsində olan əlavələri genişləndirəcək. Bu barədə Trend-ə cümə axşamı "Azerfon" şirkətinin korporativ əlaqələr üzrə meneceri Elşad Fərzəliyev deyib.
Fərzəliyevin sözlərinə görə, "Azerfon" şəbəkəsi abonentləri üçün yeniliklərdən biri əlavə multimedia xidmətlərinin mövcudluğu olacaq.
Əvvəllər deyildiyi kimi, müvafiq infrastuktur olduğu halda "Azerfon" şəbəkəsinin abonentlərinə elektron kommersiya, naviqasiya və s. xidmətlər təklif olunacaq.
Şirkət ilin sonunadək 3G şəbəkəsinin genişləndirməsini davam etdirməyi də planlaşdırır. Bu, operatora əhaliyə ənənəvi səsli xidmətlərlə yanaşı, məlumatların yüksəksürətli xidmətləri, mobil televiziya, videozəng və digər rabitə xidmətlərini də göstərməyə imkan verəcək.
"Azerfon" operatorunun 3G şəbəkəsi Bakı, Abşeron yarımadası və Sumqayıtla yanaşı, Gəncə, Şirvan, Naxçıvan, Mingəçevir, Şəki, Tovuz və Şəmkirdə də fəaliyyət göstərir. Üçüncü nəsil şəbəkənin respublikanın bütün ərazisində genişləndirilməsi şirkətin gələcək planlarına daxildir.
Fərzəliyevin əvvəllər dediyinə görə, ilin sonunadək "Azerfon" şəbəkəsinin genişləndirilməsinə 50 milyon manat investisiya qoyulacaq. Bunun hesabına regional səviyyədə həm 2G, həm də 3G şəbəkəsinin əhatə olunması planlaşdırılır.
"Azerfon" şirkətinin 3G şəbəkəsinin məlumatları ötürmə sürəti 7,2 mbit/saata çatır ki, bu da multimedialı kontentin operativ yüklənməsinə, yüksəksürətli internetə, elektron poçta çıxışa və əlavə faylların mübadiləsinə imkan verir. 3G şəbəkəsinin istifadəçiləri mobil telefon vasitəsilə böyük həcmdə məlumatları və videotəsvirləri qəbul edə və ötürə bilərlər.
