Azərbaycan, Bakı, 8 iyul /Trend, müxbir H.Vəliyev/
Azərbaycanın poçt rabitəsi operatoru "Azərpoçt" MMC "Zolotaya Korona" təcili pulköçürmə sistemini tətbiq etməyi planlaşdırır. Bu barədə Trend-ə Azərbaycanın Rabitə və İnformasiya Texnologiyaları Nazirliyindən məlumat verilib.
Məlumata görə, Azərbaycanın poçt rabitəsi operatorunda bu sistemin tətbiqi dördüncü rübün əvvəlində gözlənilir.
"Zolotaya Korona" sistemi Rusiya və MDB ölkələri ərazisində 20 mindən artıq məntəqəyə malikdir. Rusiya və MDB ərazisindəki 250-dən çox bank bu sistemin iştirakçılarıdır.
Həmçinin, oktyabrın 1-dən "Azərpoçt" MMC "Coinstar" və "Contact" təcili pul köçürmələri xidmətlərini tətbiq etməyi planlaşdırır. Hələlik operatorun şəbəkəsində yalnız "Western Union" sistemi üzrə təcili pulköçürmə xidməti təklif olunur ki, bu gün həmin sistem poçt operatorunun təqribən 160 şöbəsində istifadə olunur.
