Azərbaycan, Bakı, 24 noyabr /Trend, müxbir H.Vəliyev/
Kompüter texnikasının istehsalı ilə məşğul olan KÜR zavodu yaxın müddətdə rayon məktəb və texniki peşə məktəblərində məlumat köşklərinin quraşdırılmasına başlayacaq. Bu barədə cümə axşamı Trend-ə KÜR-dən məlumat veriblər.
Məlumat köşkləri şirkətin Mingəçevirdəki zavodunun bazasında işlənib və hazırlanıb. Onlar internet şəbəkəsi vasitəsilə mövcud iş vakansiyaları haqqında məlumat almağa imkan verir.
Layihənin sifarişçisi Əmək və Əhalinin Sosial Müdafiəsi Nazirliyinin Baş Məşğulluq İdarəsidir.
Avadanlıq iş axtaran insanlar üçün nəzərdə tutulub.
Hazırda məlumat köşkləri idarə, nazirlik, Bakı və Sumqayıtda rayon məşğulluq idarələrində, eləcə də paytaxtın ali təhsil müəssisələrində quraşdırılıb.
Quraşdırılan məlumat köşklərinin ümumi sayı 120 ədədə çatır.
Köşkün proqram tərkib hissəsini Azərbaycanın İT şirkəti SINAM işləyib.
Hazırda məlumat bazasının yenilənməsi üzrə işlər aparılır, yeni ümumi baza yaradılacaq ki, bu da tələb olunan ixtisaslar üzrə iş axtarışını daha asan həyata keçirməyə imkan verəcək.