Azərbaycan, Bakı, 13 dekabr /Trend, müxbir H.Vəliyev/
2020-ci ilədək Azərbaycanda 4G texnologiyalı CDMA stansiyalarının qurulması həyata keçiriləcək. Trend-in məlumatına görə, bu barədə "Azərbaycan 2020: Gələcəyə baxış" İnkişaf Konsepsiyası layihəsində deyilir.
Bu istiqamətdə işlər mövcud şəbəkənin müasirləşdirilməsini və 4G-ni dəstəkləyən yeni CDMA stansiyalarının quraşdırılmasını nəzərdə tutur.
Bu, CDMA şəbəkəsində məlumatların ötürülməsi qabiliyyətini artırmağa və bununla son istifadəçilərə göstərilən xidmətlərin siyahısını genişləndirməyə imkan verəcək.
CDMA simsiz şəbəkə infrastrukturunun yenilənməsi məsələsi şəbəkənin inkişafının növbəti mərhələsidir, çünki bu gün şəbəkənin operatorları tərəfindən istifadə edilən CDMA 2001X köhnəlmiş hesab edilir. Səs və məlumatların ötürülməsi xidmətlərinin təkmilləşdirilməsi simsiz CDMA şəbəkəsinin inkişafının növbəti mərhələsi olacaq.