Azərbaycan, Bakı, 14 noyabr /Trend, müxbir H.Vəliyev /
Yüksək Texnologiyalar Parkının Biznes İnkubasiya Mərkəzi dekabrda istismara veriləcək. Bu barədə Trend-ə Rabitə və İnformasiya Texnologiyaları Nazirliyinin Tədqiqatlar və Yüksək Texnologiyalar Parkının inkişafı şöbəsinin rəhbəri Ülvi Aslanov bildirib.
Onun sözlərinə görə, yeni inkubasiya mərkəzi Bakıda yerləşəcək. "AF Business House"un üçüncü mərtəbəsində yerləşəcək gələcək mərkəzin ümumi sahəsi iki min kvadratmetrə yaxın olacaq.
Aslanov bildirib: "Biznes İnkubasiya Mərkəzində həm inkubasiya, həm də Yüksək Texnologiyalar Parkının Baş İdarəsi yerləşəcək. Mərkəzin fəaliyyəti iki prinsipə əsaslanacaq. "Open office" adlanan birinci prinsip hər kəsə ayrı-ayrılıqda bir konkret layihə üzərində işləməyə imkan verəcək. İkincidə - "shared office"də beşə qədər şirkət yerləşə bilər. Hər bir şirkət komanda şəklində layihə üzərində işləyə bilər".
O qeyd edib ki, Biznes İnkubasiya Mərkəzinin iştirakçıları kompyuterlər və internetə çıxışla təmin olunacaqlar. Zərurət yaranarsa, mərkəz layihələrin təşəbbüsçülərinə lazımi dəstək göstərməyə hazır olacaq.
İnkubasiya mərkəzində hazırlanmaya ən perspektivli layihələr iddia edə bilərlər. Aslanovun sözlərinə görə, layihənin təşəbbüskarının onun müvəffəqiyyətinə inamı heç də az əhəmiyyətli aspekt deyil.
Layihə lazımi inkişaf mərhələsinə çatdıqdan sonra növbəti addım Yüksək Texnologiyalar Parkında "start-up" layihələrə keçid olacaq.
Yüksək Texnologiyalar Parkının inşası Bakının Pirallahı rayonunda nəzərdə tutulub. Parkın tikintisi üçün 50 hektar torpaq sahəsi ayrılıb.
