Azərbaycan, Bakı, 21 dekabr /Trend, müxbir H.Vəliyev/
Cari ilin yanvar-noyabr aylarında Azərbaycanın mobil qurğular bazarında Finlandiyanın "Nokia" şirkətinin payı 22,8 faizdən çox azalıb. Trend xəbər verir ki, bu barədə şənbə günü "Global Stats" Statistika Mərkəzinin yaydığı məlumatda deyilir.
Ötən ilin analoji dövrü ilə müqayisədə azalma 30,59 faiz təşkil edib. Buna baxmayaraq, hazırda bu şirkətin telefonları Azərbaycanda mobil qurğular bazarında pərakəndə satışlarda 36,32 faizlik göstərici ilə liderlik edir.
"Global Stats"ın məlumatına görə, hesabat dövrü ərzində Azərbaycanın mobil qurğular bazarında Koreyanın "Samsung" şirkətinin payında artım 55,38 faiz təşkil edərək 34,34 faizə çatıb. Ötən ilin analoji dövrü ilə müqayisədə "Samsung"un bazar payı 77,19 faiz artıb. Bu şirkətin məhsulları Azərbaycan bazarında populyarlığına görə ikinci yeri tutur.
Mobil qurğular bazarında 13,32 faiz payla "Apple" şirkəti son 11 ayda təxminən 11,51 faiz artıma nail olub. Şirkət Azərbaycan bazarında 11,43 faizlik payla üçüncü yeri tutur ki, bu da ötən ilin analoji dövrü ilə müqayisədə 37,87 faiz çoxdur.
Bazarda dördüncü yerdə 11,43 faiz payla naməlum istehsalçıların (əsasən Çin istehsalı) qurğuları qərarlaşıb.
Daha sonra mobil qurğular bazarında Blackberry - 2,97 faiz, Sony - 1,98 faiz, HTC - 1,89 faiz, LG - 0,68 faiz, Huawei - 0,98 faiz və Google - 0,18 faiz pay tutur.
