Bakı Telefon Rabitəsi İstehsalat Birliyi (İB) yeni multimedia xidmətlərini təqdim etməyi planlaşdırır. Bu barədə Trend ə İB-nin baş direktoru Beytulla Hüseynov bildirib.
Onun sözlərinə görə, yaxın günlərdə IP TI, 2005-ci ildə Bakıda yeni tətbiq edilmiş NGN (Next Generation Network) sistemi əsasında geniş imkanlı rabitə və s. kimi xidmətləri özündə əhatə edən Xətai Telekommuqikasiya qovşağında multimediya xidmətlərinin təqdimatı keçiriləcək.
Hazırda nömrələrin yeni 598, 510 indekslərinə keçirilməsi nəticəsində bu xidmətin abunəçiləri 10 min nəfərdir. Həmçinin sürətli İnternet xidmətlərindən təxminən 200 abunəçi istifadə edir. Burada şəbəkənin sürəti saniyədə 2 Mbit təşkil edir.
Layihənin icraçısı Çinin Huawei şirkətidir.
NGN (gələcək nəslin şəbəkəsi) çoxməqsədli universal şəbəkədir. NGN şəbəkəsi telekommunikasiya trafikinin müxtəlif növləri üçün zəruri olan xidmətin keyfiyyətini təmin edir.
Adıçəkilən texnologiyanın Bakıda tətbiqi abunəçilərə IoIP-telefoniya, səs rabitəsi, məlumatların ötürülməsi xidmətləri, multimediya xidmətləri, virtual özəl şəbəkələr, unifikasiya edilmiş məlumat mübadiləsi, bir anlıq məlumat mübadiləsi, interaktiv danışıq cavabı sistemi xidmətləri, interaktiv oyunlar, videokonfrans və ev meneceri kimi xidmətlərdən istifadə etməyə imkan verəcək.