Koreya informasiya-kommunikasiya texnologiyaları sahəsində Azərbaycana yardım göstərməyi təklif edir. Bu barədə, Trend agentliyinin məlumatına əsasən, rabitə və informasiya texnologiyaları naziri Əli Abbasov xəbər verib.
Onun sözlərinə görə, mayda Bakıda Azərbaycanın Rabitə və İnformasiya Texnologiyaları Nazirliyi ilə Koreyanın İnformasiya və Kommunikasiya Nazirliyi arasında imzalanmış müqaviləyə əsasən Koreya müəyyən istiqamətlərdə yardım göstərmək niyyətindədir.
"Koreya Azərbaycanda elektron hökumətin inkişaf etdirilməsi üçün vəsaitlərin yatırılmasına dair təkliflərini təqdim edib. Koreya $30 mln həcmində uzunmüddətli kredit vəsaitləri ayırmağa hazırdır" - deyə nazir vurğulayıb.
Ə.Abbasovun sözlərinə görə, hazırda bu vəsaitlərin istifadəsinin və Koreya elektron hökumət modelinin Azərbaycanda tətbiqinin məqsədəuyğunluğu öyrənilir.
Ekspertlərin fikrincə, elektron hökumətin tətbiqinin əsas məqsədi dövlət orqarlarının fəaliyyətinin səmərəliyini artırmaqdır, eləcə də dövlətlə cəmiyyətin qarşılıqlı münasibətlərini yaxşılaşdırmaqdır.
