Bakı. Trend:
İlon Maskın “The Boring Company” şirkəti Las-Veqasdakı yeraltı “Vegas Loop” tunel şəbəkəsində “Tesla” avtomobillərinin avtonom idarəetmə sistemini test etməyə başlayıb.
Trend “Fortune”a istinadən xəbər verir ki, sınaqlar bir neçə aydır davam edir. Hazırda avtomobillərdə təhlükəsizlik sürücüləri mövcuddur və onlar zərurət olduqda idarəetməni öz üzərlərinə götürürlər. İndiyədək qəza qeydə alınmasa da, tam sürücüsüz rejimə keçidin hələ tez olduğu bildirilir.
Las-Veqas Konfranslar və Turizm İdarəsinin rəhbəri Stiv Hill qeyd edib ki, avtonom sistem bəzi çətinliklərlə üzləşir: stansiyalarda naviqasiyanın dəqiq işləməməsi, parlaq işıqlandırma və hamar divarların sistemi çaşdırması müşahidə olunub.
“Vegas Loop” sərnişinlərin “Tesla” elektrikli avtomobillərində stansiyalar arasında birbaşa, aralıq dayanacaqsız hərəkət etdiyi qapalı tunellərdən ibarət şəbəkədir. Burada nə işıqfor, nə digər avtomobillər, nə də piyadalar olduğundan sistem üçün ideal mühit hesab edilir.
Xatırladaq ki, İlon Mask daha əvvəl sürücüsüz “Robotaxi” xidmətinin ilin sonuna qədər ABŞ əhalisinin yarısını əhatə edəcəyini vəd etmişdi.