Bakı. Trend::
Bolqarıstanın cənub sahillərində, Burqas şəhəri yaxınlığında baş verən yol qəzası nəticəsində 6 qeyri-qanuni mühacir həlak olub.
Trend xəbər verir ki, bu barədə Bolqarıstan Milli Radiosu məlumat yayıb.
Bildirilib ki, sərhəd polisi Kiten şəhərindən qeyri-qanuni miqrantları daşıyan avtomobili təxminən 40 kilometr məsafədə təqib edib. Nəqliyyat vasitəsi Burqasa keçməyə nail olub, lakin maneəni aşmaq istəyərkən aşıb və gölə düşüb.
Hadisə nəticəsində 6 nəfər hadisə yerində ölüb, 3 nəfər yaralanıb. Yaralılar xəstəxanaya yerləşdirilib. Rumıniya vətəndaşı olan sürücü xəsarət almayıb və hazırda polis nəzarətindədir.
Hadisə ilə bağlı araşdırma aparılır.