Azərbaycan, Bakı, 25 oktyabr /Trend, müxbir R.Hafizoğlu/
Azərbaycan, Gürcüstan və Türkiyə dəmiryol sistemlərini birləşdirəcək Bakı-Tbilisi-Qars dəmiryolu 2013-cü ildə istismara verəcək. Bu barədə bazar ertəsi Trend-ə Türkiyənin Azərbaycandakı səfiri Hulusi Kılıc deyib.
Onun sözlərinə görə, Bakı-Tbilisi-Qars dəmiryol layihəsi vacib layihələrdən biridir. Bu layihə çərçivəsində həm Gürcüstan, həm də Türkiyə ərazisində işlər aparılır. Nəzərdə tutulub ki, tikinti çərçivəsində işlər 2012-ci ilin sonuna başa çatacaq, 2013-cü ildə isə dəmiryol istismara veriləcək.
Bakı-Tbilisi-Qars Çindən daşımaları təmin edəcək və Asiyanı Avropa ilə birləşdirəcək layihədir.
"Buna görə də Azərbaycanın bu layihədə vasitəçiliyi mühümdür", - səfir qeyd edib.
Bakı-Tbilisi-Qars layihəsi çərçivəsində dəmiryol magistralının yeni 105 km-lik qolunun tikintisi də planlaşdırılır. Bunun 76 km-i Türkiyə, 29 km-i isə Gürcüstan ərazisindən keçəcək. Bundan əlavə, nəqletmə gücünü ildə 15 milyon ton yükə çatdırmaq üçün Gürcüstanda 183 km-lik Axalkalaki-Marabda-Tbilisi dəmir yolunun 183 km-lik hissəsi yenidən qurulacaq. Axalkalakidə Gürcüstanda mövcud olan dəmiryol təkərlərinin Avropa standartlarına uyğun təkərlərlə əvəz edilməsi üzrə məntəqələrin tikilməsi də planlaşdırılır.
Bundan əvvəl Azərbaycanın nəqliyyat naziri Ziya Məmmədovun verdiyi məlumata görə, tikinti işlərinin 2012-ci ilin birinci yarısında başa çatdırılması planlaşdırılıb. Lakin layihənin həyata keçirilmə müddətinin razılaşdırılmasına baxmayaraq, tərəflər prosesin sürətləndirilməsi və işlərin böyük hissəsinin 2011-ci ilin sonunadək başa çatdırılması üzərində işləyirlər.
Dəhlizin yüksək buraxılış qabiliyyəti 17 milyon ton yük təşkil edəcək. İlkin mərhələdə bu göstərici 1 milyon sərnişin və 6,5 milyon ton yük təşkil edəcək.
