Azərbaycan, Bakı, 3 dekabr /Trend, müxbir Təmkin Cəfərov/
İranın cənub-şərqində ölkənin Quru Qoşunlarının irimiqyaslı hərbi təlimləri keçiriləcək. Bunu İranın Quru Qoşunları komandanı, briqada generalı Əhmədrza Purdastan deyib. Trend-in məlumatına görə, bu barədə İRNA agentliyi xəbər verir.
Ə.Purdastan bildirib ki, hərbi təlimlərin dekabr ayının sonunda keçirilməsi planlaşdırılır: "Təlimlərdə düşmənlə taktiki döyüş və yeni təhlükələrlə mübarizə yolları sınanacaq. Səhra şəraitində keçiriləcək təlimlərdə həqiqi güllələrdən istifadə olunacaq".
Onun sözlərinə görə, təlimlərdə pilotsuz təyyarələrdən də istifadə olunacaq: "Pilotsuz təyyarələr həm foto çəkəcək və həmdə kamikadze hücumları təşkil edəcək".
Qeyd edək ki, bundan öncə Quru Qoşunlarının irimiqyaslı təlimlərinin noyabr ayında keçiriləcəyi bildirilirdi.