Bakı. Trend:
ABŞ Los-Anceles şəhərində yeni, sürətlə yayılan ocağın yaranması ilə əlaqədar meşə yanğınları şiddətlənib.
Trend BBC-ə istinadən xəbər verir ki, yanğın ocağı Los-Anceles şəhərinin mərkəzindən təxminən 70 kilometr şimal-qərbdə Kastaik gölü yaxınlığında yerləşən Hyuz rayonunda qeydə alınıb.
Dağətəyi ərazidə çox sayda yaşayış massivləri və məktəblər yerləşir. Ərazidə şiddətli külək müşahidə olunduğundan və havaların quraq keçməsi səbəbindən yanğın sürətlə geniş sahələrə yayılır. Məlumata görə, bölgədə küləyin sürəti saatda 32 kilometrdən 48 kilometrə qədər dəyişir.
Rayonun yanğın zonasına ən yaxın olan ərazilərindən 31 min nəfər icbari qaydada təxliyə olunub, daha 23, min nəfərin təhlükə zonasını tərk etmələri tələb olunub. Bundan savayı, bölgədə yerləşən cəzaçəkmə müəssisəsindən də 500-ə yaxın məhbusun təxliyə edildiyi bildirilir.