Bakı. Trend:
Bu gün səhər saatlarında İranın mərkəzində yerləşən İsfahan vilayətində magistral yolda 13 avtomobilin iştirakı ilə zəncirvari qəza baş verib.
Trend-in məlumatına görə, bunu İranın İsfahan Yanğınsöndürmə Təşkilatının sözçüsü Məhəmməd Şəriəti yerli mediaya açıqlamasında deyib.
Onun sözlərinə görə, hadisə nəticəsində 2 nəfər ölüb, 22 nəfər xəsarət alıb. Xəsarət alan şəxslər təcili yardım maşınları ilə tibb mərkəzlərinə çatdırılıblar.
Şəriəti əlavə edib ki, 2 yük maşını, 6 minik avtomobili, 4 mikroavtobus və bir avtobus qəzanın iştirakçılarıdır.
Faktla bağlı araşdırma aparılır.