Bakı. Trend:
ABŞ prezidenti Donald Trampın administrasiyası qeyri-rəsmi kanallarla Şərqi Avropa ölkələrinə, o cümlədən, Moldova və tanınmamış Kosovaya ABŞ-dən deportasiya olunan qanunsuz miqrantları qəbul etməyi təklif edib.
Trend xəbər verir ki, bunu "The Wall Street Journal" (WSJ) öz mənbələrinə istinadən yazır.
Nəşrin müsahiblərinin məlumatına görə, Vaşinqton qanunsuz miqrantların deportasiyası ilə bağlı Benin, Ruanda, Liviya və Esvatini kimi dörd Afrika ölkəsi, eləcə də, Monqolustan ilə danışıqlar aparır. İki Latın Amerikası dövləti - Honduras və Kosta Rika ilə isə Ağ Ev uzunmüddətli sövdələşmələr bağlamaq niyyətindədir.
Amerika administrasiyası miqrasiya böhranının həllində əməkdaşlığın müqabilində həmin ölkələrə maddi yardım göstərmək istəyir.
Qeyd edək ki, söhbət öz vətəndaşlarını qəbul etməkdən imtina edən və ya bu prosesi uzadan ölkələrin vətəndaşları olan mühacirlərdən gedir.