Bakı. Trend:
Rusiyanın “Lada” brendinin rəsmi istehsalçısı “AvtoVAZ” 2021-ci ilin oktyabrından 2023-cü ilin avqustunadək satılmış 47 minə yaxın avtomobili geri çağırmaq qərarına gəlib.
Trend xəbər verir ki, bu barədə “Rosstandart” məlumat yayıb.
Bildirilib ki, geri çağırma 22 731 ədəd “Lada Vesta” və 24 408 ədəd “Lada Largus” modelini əhatə edir. Qərarın səbəbi avtomobillərdə fövqəladə hallara reaksiya sistemi – SVEOS üçün nəzərdə tutulan idarəetmə blokunun olmamasıdır.
Şirkət avtomobil sahiblərinə yaxınlıqdakı rəsmi servis mərkəzinə müraciət etməyi tövsiyə edib. Problemin aradan qaldırılması üçün bütün texniki xidmətlər ödənişsiz həyata keçiriləcək.