Bakı. Trend:
Beynəlxalq Atom Enerjisi Agentliyinin (BAEA) rəhbəri çərşənbə günü “Associated Press” agentliyinə müsahibəsində bildirib ki, Suriyanın yeni hökuməti BMT-nin nüvə nəzarəti orqanının müfəttişlərinə şübhəli keçmiş nüvə obyektlərinə dərhal giriş icazəsi verməyə razılaşıb.
Trend xarici mediaya istinadla xəbər verir ki, BAEA-nın baş direktoru Rafael Mariano Qrossi Dəməşqdə Suriyanın keçid dövrü Prezidenti Əhməd əl-Şaara və digər rəsmilərlə görüşü əsnasında razılıq əldə olunduğunu bildirib.
Əl-Şaara, həmçinin ölkəsinin gələcəkdə nüvə enerjisi əldə etməkdə maraqlı olduğunu bildirib.
Qrossi jurnalistlərə müsahibəsində deyib: “Agentliyin məqsədi əvvəllər mühakimə etdiyi, ehtimal ki, nüvə silahları ilə bağlı olan bəzi fəaliyyətlərə tam aydınlıq gətirməkdir”.
BAEA komandası Suriyanın sabiq dövlət başçısı Bəşər Əsədin hələ hakimiyyətdə olduğu vaxt – 2024-cü ildə atom enerjisi baxımından bəzi maraqlı yerləri ziyarət edib. Dekabrda Əsədin devrilməsindən bəri Agentlik Suriyanın nüvə proqramı ilə əlaqəli obyektlərə girişi bərpa etməyə çalışır.
Qrossi bildirib ki, Suriyanın yeni hökuməti beynəlxalq əməkdaşlığa sadiqdir. O, təftiş prosesinin aylar ərzində başa çatdırılacağına ümid etdiyini vurğulayıb.