Bakı. Trend:
ABŞ Prezidenti Donald Trampın Latın Amerikasından gələn narkotrafikə qarşı mübarizəsi müdafiə startapları üçün geniş imkanlar açıb.
Trend-in məlumatına görə, bu barədə "The Wall Street Journal" xəbər yayıb.
Məqaləyə görə, startaplar dronlarını, sensorlarını, süni intellekt alətlərini və məlumat emalı platformalarını Trampın "narkoterrorizmə" qarşı mübarizəsinə uyğunlaşdırıblar. ABŞ-nin Karib hövzəsi və cənub sərhədində kampaniyanın gücləndirilməsi pilotsuz uçuş aparatlarına və süni intellektə tələbatı sürətlə artırıb.
Məsələn, "Shield AI" dronları 60 min funt kokainin rekord həcmdə müsadirəsində istifadə olunub. Sahil Mühafizəsinin məlumatına görə, onların "V-BAT" modeli vasitəsilə 1 milyard dollardan çox dəyərində narkotik müsadirə edilib.
Cənub Komandanlığı robotlaşdırılmış və pilotsuz sistemlər üçün "sınaq poliqonları"na tələbatın artdığını bildirir. Hərbi qurumlar isə dronların qarşısını almaq üçün yeni komplekslər, o cümlədən Ukrayna istehsalı olan "Moodro" sistemlərini əldə edir.