Bakı. Trend:
Hindistanın Mülki Aviasiya Baş İdarəsi dekabrın əvvəlində genişmiqyaslı uçuş ləğvlərinə görə ucuz aviaşirkət "IndiGo"nu 2,45 milyon dollar məbləğində rekord cərimə edib.
Trend xəbər verir ki, bu barədə tənzimləyici qurum açıqlamasında məlumat verib.
Açıqlamada deyilir ki, 2025-ci il dekabrın 3-5-i tarixləri arasında "IndiGo" şirkətinin geniş yayılmış uçuş gecikmələri və ləğvləri nəticəsində 2 507 reys ləğv olunub, 1 852 reys gecikib və müxtəlif hava limanlarında 3 000-dən çox sərnişin narahat olub. Hadisələrdən sonra Mülki Aviasiya Nazirliyinin təlimatı ilə IndiGo-nun fəaliyyətindəki pozuntuları araşdırmaq üçün dörd nəfərlik xüsusi komitə yaradılıb.
Komitənin araşdırması göstərib ki, problemlərin əsas səbəbləri əməliyyatların həddindən artıq optimallaşdırılması, tənzimləyici hazırlığın yetərsizliyi, proqram təminatındakı çatışmazlıqlar və aviaşirkətin idarəetmə strukturu ilə əməliyyat nəzarətindəki nöqsanlardır.
Qeyd olunur ki, "IndiGo"nun donanması əsasən dar gövdəli "Airbus A320"lərdən ibarət olub və 400-dən çox təyyarəni əhatə edir.