Bakı. Trend:
Birləşmiş Ərəb Əmirliklərinin Əbu-Dabi şəhərində Ukrayna münaqişəsinin nizamlanması üzrə keçirilən üçtərəfli (ABŞ-Ukrayna-Rusiya) danışıqların ikinci raundu başa çatıb.
Trend bu barədə xarici KİV-ə istinadən xəbər verir.
Məlumata görə, iki gün davam edən danışıqların yekununda tərəflər 314 hərbi əsirin dəyişdirilməsi barədə razılaşıblar.
Bu barədə ABŞ prezidenti Donald Trampın xüsusi elçisi Stiv Uitkoff X sosial şəbəkəsində məlumat verib.
Qısa müddət sonra Rusiya Müdafiə Nazirliyi “157-yə 157” formulu üzrə əsir mübadiləsinin baş tutduğunu açıqlayıb.
xxx
11:50
Əbu-Dabidə Rusiya, Ukrayna və ABŞ arasında üçtərəfli danışıqların ikinci günü start götürüb.
Trend xarici KİV-ə istinadən xəbər verir ki, bu barədə fevralın 5-də Ukraynanın Milli Təhlükəsizlik və Müdafiə Şurasının (MTMŞ) katibi Rüstəm Umerov məlumat verib.
“Əbu-Dabidə danışıqların ikinci günü başlayıb”,- deyə o, "Telegram" kanalında yazıb.
Onun sözlərinə görə, danışıqları əvvəlki formatlarda aparılır: üçtərəfli məsləhətləşmələr keçirilir və bundan sonra mövqelərin əlaqələndirilməsi həyata keçirilir.
Günün nəticələri barədə daha sonra məlumat veriləcəyi bildirilir.
