Bakı.Trend:
Ermənistan hökuməti Rusiyalı sərhədçilərin Ermənistan-Türkiyə sərhədində yerləşən “Axurik” nəzarət buraxılış məntəqəsindən çıxarıldığını rəsmən təsdiqləyib.
Trend bu barədə Ermənistan KİV-ə istinadən xəbər verir.
Ermənistan hökumətinin 2025-ci il proqramının həyata keçirilməsi ilə bağlı təqdim olunan hesabata əsasən, hazırda həmin məntəqədə yalnız Ermənistan Milli Təhlükəsizlik Xidmətinin sərhəd qoşunları xidmət aparır.
“2025-ci il martın 1-dən etibarən Ermənistan–Türkiyə dövlət sərhədində yerləşən “Marqara” sərhəd-keçid məntəqəsi tam şəkildə Ermənistan Milli Təhlükəsizlik Xidmətinin qoşunları ilə komplektləşdirilib. 2026-cı ilin əvvəlindən isə Ermənistan–Türkiyə dövlət sərhədində yerləşən “Axurik” sərhəd-keçid məntəqəsi də yalnız Ermənistan Milli Təhlükəsizlik Xidmətinin qüvvələri ilə təmin olunub. Hazırda dövlət sərhədimizdə (Türkiyə ilə) Ermənistan Milli Təhlükəsizlik Xidmətinin tam nəzarətində olmayan heç bir (fəaliyyət göstərən) sərhəd-keçid məntəqəsi qalmayıb”, – deyə hesabatda vurğulanır.