Bakı. Trend:
Üç nəfərlik ekipajı daşıyan "Soyuz MS-26" pilotlu kosmik gəmisinin geri qayıdış aparatı bazar günündən bazar ertəsinə keçən gecə Qazaxıstan ərazisinə enəcək.
Trend-in məlumatına görə, bu barədə Roskosmosun mətbuat xidməti məlumat yayıb. Bildirilib ki, gəmi Beynəlxalq Kosmik Stansiyaya (BKS) göndərilən 72-ci uzunmüddətli ekspedisiyanın iştirakçıları – Roskosmos kosmonavtları Aleksey Ovçinin və İvan Vaqner, eləcə də NASA astronavtı Donald Pettiti Yerə qaytaracaq.
"Soyuz MS-26" kosmik gəmisinin BKS-in “Rassvet” modulundan ayrılması Bakı vaxtı ilə saat 01:56-a planlaşdırılıb. Bundan sonra gəmi avtonom uçuş rejiminə keçəcək, təxminən iki saat sonra isə mühərrikləri əyləc manevri üçün işə salaraq Yer orbitini tərk edəcək.
Eniş modulunun atmosferin sıx təbəqələrinə daxil olduqdan sonra Bakı vaxtı ilə saat 05:17-də Qazaxıstana enməsi gözlənilir. Yerə enişin ardından ekipajı qarşılayan axtarış-xilasetmə qrupları onları təxliyə edəcək.