Azərbaycan, Bakı, 20 yanvar / Trend, müxbir E.Tariverdiyeva/
Bu il Dağlıq Qarabağ nizamlanmasında irəliləyişə praktiki olaraq heç bir şans yoxdur. Karneqi Fondunun eksperti, ingilis jurnalist, "Qara bağ: Azərbaycan və Ermənistan - sülhlə müharibə arasında" kitabının müəllifi Tomas de Vaal belə hesab edir.
"Görünür, tərəflərdən heç biri ötən ilin iyununda Kazanda qəbul edilməyən saziş layihəsi üzrə öz mövqeyini dəyişməyə hazır deyil", - de Vaal Trend-ə deyib.
Ekspertin sözlərinə görə, bu il bir neçə ildönümünün olması Dağlıq Qarabağ ətrafındakı sülh prosesi və münaqişə tərəfləri arasında sülh müaviləsinin bağlanması üzrə skeptisizmi artırır.
"Mən məsələn, Xocalıda dinc əhalinin qırılmasının və 1992-ci ildə ATƏT-in Minsk qrupunun yaranmasının 20-ci ildönümünlərini nəzərdə tuturam. Bundan başqa, bu il MQ-nin üç həmsədr ölkəsinin hamısında prezident seçkiləri keçiriləcək və siyasi elitanın diqqəti bu prosesdən yayınacaq", - o deyib.
"Bu o deməkdir ki, 2012-ci il vasitəçilərin bu prosesi həll etməyə deyil, onu idarə etməyə ümid edəcəkləri il olacaq", - de Vaal bildirib.
Azərbaycan, Rusiya və Ermənistan prezidentləri İlham Əliyev, Dmitri Medvedev və Serj Sarkisyanın onuncu görüşü yanvarın 23-də Soçidə keçiriləcək. Bu görüş Rusiya Prezidentinin təşəbbüsü ilə baş tutacaq.
İki Cənubi Qafqaz ölkəsi arasında münaqişə 1988-ci ildə Ermənistanın Azərbaycana qarşı ərazi iddiası irəli sürməsi zəminində yaranıb. Azərbaycan torpaqlarının iyirmi faizi, yəni Dağlıq Qarabağ ərazisi və bu əraziyə bitişik yeddi rayon Ermənistan Silahlı Qüvvələrinin işğalı altındadır. 1994-cü ildə tərəflər atəşkəs rejiminə dair razılaşma əldə ediblər və o vaxtdan bəri ATƏT-in Minsk qrupunun himayəsi altında, Rusiya, Fransa və ABŞ-ın həmsədrliyi ilə hələ də nəticəsiz sülh danışıqları aparılır.
BMT Təhlükəsizlik Şurasının Dağlıq Qarabağ və ətraf rayonların azad edilməsinə dair qəbul etdiyi dörd qətnaməni Ermənistan bu günə qədər yerinə yetirməyib.