Azərbaycan, Bakı, 24yanvar / Trend , müxbir S.İlhamqızı/ Builki prezident seçkisi ilə əlaqədar, müxalifət partiyaları arasında yeni müttəfiqlik sazişi imzalana bilər. Bu barədə Trend ə müxalifətçi Tərəqqi Partiyasının sədri Çingiz Dəmiroğlu məlumat verib.
Müxalifəti təmçil edən Müsavat, AMİP, ADP, Tərəqqi partiyalarının və Azərbaycan Naminə İctimai Forumun rəhbərləri ötən ilin yayından başlayaraq, məşvərət aparmaq məqsədliə toplanırlar. Məşvərət qurumunun dünənki toplantısında bu ilin oktyabrında keçiriləcək prezident seçkisində iştirak taktikası barədə müzakirələr aparıblar.
Dəmiroğlunun sözlərinə görə, bir çox məsələlərdə "Beşlər"in mövqeləri yaxınlaşıb. Onun sözlərinə görə, tərəflər arasınla müttəfiqlik sazişinin imzalanması nəzərdə tutulur: "Bu format çərçivəsində mart ayına qədər bir qərara gəlinəcək. Məqsədimiz prezident seçkisində ikinci turun baş tutmasına və sonra II turda müxalifətin birliyinə nail olmaqdır"-deyə Tərəqqi Partiyasının sədri bildirib.
"Beşlər"də təmsil olunan partiyalardan - Müsavat Partiyasının başqanı İsa Qəmbər, AMİP-in lideri Etibar Məmmədov 2003-cü ildə keçirilmiş prezident seçkisində namizəd olublar.
AMİP-də də beş müxalifət təşkilatının müttəfiqliyini istisna etmirlər. Lakin AMİP funksioneri Əli Orucov hesab edir ki, ölkədə siyasi mühit dəyişməsə, vətəndaşların sərbəst toplaşmaq hüququ təmin olunmasa, bütün namizədlər üçün bərabər şərait yaradılmasa, prezident seçkisində iştirakın mənası qalmır: " Belə olan halda, müxalifətin seçkidə iştirakı iqtidara imitasiya yaratmaq imkanı verəcək"-deyə Orucov Trend ə açıqlamasında bildirib.