Azərbaycan, Bakı, 18 fevral / Trend , müxbir S.İlhamqızı/ Müxalifətçi Azərbaycan Milli İstiqlal Partiyasının Mərkəzi Şurasının bazar günü keçirilən iclasında qərara alınıb ki, yaxın 45 gün ərzində partiyanın qurultayı keçirilsin. Bu barədə Trend ə AMİP-in baş katibi Fuad Muxtarov məlumat verib.
AMİP-in sədri Ayaz Rüstəmov ötən ilin sonunda səhhətində problemlər olduğunu əsas gətirərək vəzifəsindən istefa vermişdi.
Qurultayda partiyanın yeni sədri seçiləcək.
Müxtarov bildirib ki, qurultayın günü AMİP-in Siyasi Şurası və katibliyi tərəfindən müəyyənləşdiriləcək.
Mərkəzi Şuranın iclasında həmçinin ölkədəki ictimai-siyasi vəziyyətə dair qətnamə qəbul olunub, sənəddə hakimiyyətdən siyasi partiyalara bərabər şərait yaradılması, söz azadlığına, jurnalistlərə təzyiqlərin dayandırılması, əhalinin ağır sosial problemlərinin həll edilməsi tələb olunub.
AMİP 1992-ci ildə yaradılan və Azərbaycanda ilk dövlət qeydiyyatına alınan partiyadır. Müxalifəti təmsil edən AMİP-in qurucusu və 2004-cü ilin sonunadək sədri olan Etibar Məmmədov hazırda Beynəlxalq Demokrat İttifaqının (BDİ) sədr müavinidir.