Bakı.Trend:
15 sentyabr gecə saatlarında naməlum pilotsuz uçuş aparatı Litvanın hava məkanına daxil olub.
Xarici KİV-in məlumatına görə, insanlar mobil telefonlarına göndərilən bildirişlər vasitəsilə havadan təhlükə barədə xəbərdar ediliblər.
Düşmən hədəfinin məhv edilməsi üçün NATO aviasiyası havaya qaldırılıb. Ölkə Prezidenti Gitanas Nauseda "X" sosial şəbəkəsindəki səhifəsində bildirib ki, qırıcı təyyarələr pilotsuz uçuş aparatını operativ şəkildə vurublar.
“Litvanın hava məkanına yenicə daxil olan pilotsuz uçuş aparatı NATO qırıcıları tərəfindən vurulub. Müttəfiq qüvvələrin şəxsi heyətinə operativ reaksiyaya görə təşəkkür edirəm”, – deyə Gitanas Nauseda qeyd edib.
O, həmçinin Litva hərbçilərinin hava məkanında aşkar edilmiş təhlükəyə operativ reaksiya verdiyini vurğulayıb. Prezident Rusiyanın Ukraynaya qarşı təcavüzünün güclənməsi fonunda belə hazırlığın region üçün “həyati əhəmiyyət daşıdığını” bildirib.
Nauseda Litvanın NATO müttəfiqləri ilə birlikdə öz hava məkanını qorumağa davam edəcəyini də diqqətə çatdırıb.
