Azərbaycan, Bakı, 05 mart / Trend ", müxbir A.Salmanov/ 10 saylı İslah Əmək Müəssisəsində cəza çəkən Azərbaycanın müxalif Milli İstiqlal Partiyasının (AMİP) fəalı Musa Rahimin səhhəti pisləşib. Bu barədə çərşənbə günü Trend ə Rahimin vəkili Ənnağı Məmmədli bildirib.
Rahim 2007-ci il avqustun sonunda həbs edilib. Məhkəmənin qərarı ilə Rahim Cinayət Məcəlləsinin dövlət qulluqçusuna qarşı xuliqanlıq (221.2-ci) maddəsi ilə təqsirli bilinərək 5 il müddətinə azadlıqdan məhrum edilib.
Məmmədli deyib ki, Rahimin Penitensiar Xidmətin Müalicə Müəssisəsinə köçürülməsi üçün 10 saylı İslah Əmək Müəssisəsinin rəhbərliyinə müraciət edib.
AMİP 1992-ci ildə yaradılan və Azərbaycanda ilk dövlət qeydiyyatına alınan partiyadır. Müxalifəti təmsil edən AMİP-in qurucusu və 2004-cü ilin sonunadək sədri olan Etibar Məmmədov hazırda Beynəlxalq Demokrat İttifaqının (BDİ) sədr müavinidir.