Azərbaycan, Bakı,28 mart / Trend , müxbir R.Hafizoğlu,R.Abdullayev / Fələstində mübarizə aparan İslami Müqavimət Təşkilatı "Həmas"ın hakim Fəth təşkilatıyla əməkdaşlıq səyləri regionda bir çox problemləri həll edə bilər. "Fəth və Həmas arasındakı danışıqlar fələstinlilərin maraqlarına uyğundur"-deyə, Qəzzə İslam Universitetinin dekanı İsam Məhəmməd Trend a bildirib.
"Reuters" agentliyinin martın 25-də verdiyi məlumata görə, Fələstindəki mübərizə aparan İslami Müqavimət Təşkilatı "Həmas" ilə Fələstin adminstrasiyasının təmsil edildiyi hakim Fəth hərəkatı aprelın 5-də sülh danışıqlarına başlamaq barədə razılıq əldə ediblər.
"İki təşkilat arasında danışıqların baş tutması bir çox problemlərin həlli üçün çox önəmlidir"- deyə, Məhəmməd cümə günü Qəzzədən elektron poçtla bildirib. O hesab edir ki, iki tərəf arasında danışıqların bərpa olunması nəinki Fələstində hətta ölkə sərhədlərindən kənarda olan bu iki təşkilatın nümayəndərinin bir araya gəlməsi ilə nəticələnə bilər.
"Danışıqların bərpası İsrailin regiondakı maraqlarına zidd olsa da, Fəth dialoqa getməklə heç də həmişə sionistlərin yanında olmadığını təsdiqlədi"-deyə, o qeyd edib. Məhəmmədin fikrincə, İsrail Fəth-Həmas danışıqlarının yarıda buraxılması üçün Fələstin adminstrasiyasına təzyiq göstərəcək.
Fələstin üzrə türkiyəli araşdırmaçı Əhməd Varol da hesab edir ki, Fəth və Həmas arasında dialoqun başlaması regionda stabilliyin formalaşması üçün təkan hesab edilə bilər. "Fəth və Həmas danışıqların başlanmasına geciksələr də, iki tərəfin bir araya gəlməsi ümumi düşmənə qarşı birləşmək kimi qiymətləndirilməlidir" -deyə cümə günü Varol İstambuldan elektron poçtla bildirib.
Onun fikrincə, İsrail və Fəth təşkilatının Həmas ilə dialoqa getməkdən başqa çıxış yolları yoxdur.
İsrailin Baş Naziri Ehud Olmert bu qünlərdə jurnalistlərə bildirib ki, Fələstin ictimaiyyətinin bir çox hissəsinin İsrail əhalisinə qarşı terror aktlarının təşkili və həyata keçirilməsi ilə məşğul olmasına baxmayaraq, İsrail hökuməti mülayim fələstin fraksiyaları ilə danışıqları dayandırmağa hazırlaşmır.
O, həmçinin Qəzzə zolağından İsrail ərazisinin raket atəşinə tutulmasını pisləyib və vurğulayıb ki, İsrail Həmas terrorçu təşkilatı ilə dialoqa başlamağa hazırlaşmır.
Baş Nazir bildirib ki, israilliləri davamlı olaraq raket atəşinə tutanlarla kompromisə getmək niyyətində deyil. İsrail höküməti Həmas ilə işləri başqa yolla aparacaq və bu yol onun üçün çox ağrılı olacaq - deyə o bildirib.
