Azərbaycan, Bakı, 26 may/ Trend , müxbir E.Babayev/ Azərbaycanın müxalif Müsavat Partiyası Seçki Məcəlləsinə əlavə və dəyişikliklərlə bağlı yeni qanun layihəsi hazırlayıb. "Həmin layihə partiyanın Divanının bazar ertəsi keçirilən iclasında bir daha müzakirə olunub və Milli Məclisə təqdim olunması üçün, partiyadan olan millət vəkillərinə həvalə edilib" - bazar ertəsi Trend a Müsavatın Mərkəzi İcra Aparatının rəhbəri Arif Hacılı partiya Divanının iclasından sonra məlumat verib.
" Trend un arayışı: Seçki Məcəlləsinə əlavə və dəyişiklikləri nəzərdə tutan layihənin mayın 30-da Milli Məclisdə qəbulu gözlənilir. Dəyişikliklər sırasında dövlət KİV-də təbliğatın qadağan olunması, namizədlər üçün depozitin 33 min manatdan 300 min manata qaldırılması, İnzibati Xətalar Məcəlləsinin tətbiqi nəticəsində namizədlik qeydiyyatı ləğvinin sadələşdirilməsi kimi məsələlərin yer alması müxalifətin narazılığına səbəb olub.
Hacılı bildirib ki, Müsavat bundan əvvəl belə bir layihə hazırlayıb, Milli Məclisə təqdim etmişdi. "Bu layihə daha da təkmilləşidirilib və partiyanın təklifləri daha dolğun şəkildə yeni layihədə əksini tapıb",- deyə Hacılı bildirib. Hacılı əlavə edib ki, bu addımın beş müxalifət təşkilatının (Demokrat, Müsavat, Tərəqqi, Azərbaycan Naminə İctimai Forum, Milli İstiqlal) Seçki Məcəlləsi ilə bağlı vahid sənəd hazırlamaq ideyasına aidiyyatı yoxdur. "Bu məsələ qüvvədədir və yaxın günlərdə müxalifətin bununla bağlı toplantısı keçiriləcək. Bizim ayrıca qanun layihəsi təqdim etməyimiz "beşlər" formatında olan partiyalarla razılaşdırılb" - deyə o əlavə edib.
Müxalifəti təmsil edən Müsavat Partiyası 1992-ci ildə yaradılıb. Partiyanın başqanı İsa Qəmbər Azərbaycan parlamentinin eks-spikeri (1992-93-cü illərdə) və 2003-cü ildə keçirilmiş prezident seçkisində prezidentliyə namizəd olub. Partiya beş nəfər deputatla parlamentdə təmsil olunur.
Məqalə müəllifi ilə əlaqə ünvanı: [email protected]
