Azərbaycan, Bakı, 06 iyun/ Trend , müxbir E.Babayev/ Solçu Azərbaycan Sosial Demokrat Partiyası (ASDP) hesab edir ki, Azərbaycan müxalifətinin Seçki Məcəlləsinə əlavə və dəyişikliklərlə bağlı etirazının arxasında başqa maraqlar dayanır. "Bizim partiya Seçki Məcəlləsinə əlavə və dəyişikliklərdən narazı deyil və burada müxalifətin imkanlarının məhdudlaşdırılmasından söhbət belə gedə bilməz", - deyə cümə günü Trend -a ASDP həmsədri Araz Əlizadə bildirib.
Trend -un arayışı: Azərbaycanda prezident seçkisi oktyabrın 15-də keçiriləcək. Parlament bazar ertəsi Seçki Məcəlləsinə əlavə və dəyişiklikləri qəbul edib. Yeni layihəyə görə, prezidentliyə namizədlərin depozit qoyma şərti götürülür. Namizədlər yalnız imza toplayacaqlar. Namizədliyin qeydə alınması üçün tələb olunan 45 min imzanın isə 40 minə endirilməsi nəzərdə tutulur. Bundan əlavə, seçki təbliğatının müddəti 120 gündən 75 günə endirilir. Məcəllədə dövlət televiziyasında namizədlərə pulsuz efir vaxtı ayrılması qadağan edilib. Əksər müxalifət partiyaları dəyişikliklərdən narazı qalıb və bəyan edib ki, dəyişikliklər müxalifətin imkanlarını məhdudlaşdırır.
Əlizadə iddia edib ki, bəzi müxalifət partiyalarının narazılığının arxasında maddi maraqlar dayanır. "Maddi baxımdan paylarının çox olmasını istəyirlər", - deyən Əlizadə bəyan edib ki, Seçki Məcəlləsindəki dəyişikliklər sırasında narazılığa səbəb olacaq məqam yoxdur. "Bu heç də bizim hakimiyyətin mövqeyini müdafiə etməyimiz kimi başa düşülməməldir. Sadəcə olaraq reallıq bundan ibarətdir", - deyən Əlizadə ASDP-nin son vaxtlar hakimiyyətə qarşı radikal mövqedən çıxış etməməsinin səbəbinin nədən ibarət olması ilə bağlı suala cavabında isə "Radikallığın heç bir xeyri yoxdur. Sirkə nə qədər tünd olsa, öz qabını çatladar" deməklə kifayətlənib. Əlizadə hesab edir ki, tam demokratik seçkilərdə Azərbaycan müxalifətini təmsil edən namizədlər bir yerdə 25 faizdən artıq səs toplaya bilməyəcəklər. Hakimiyyətin namizədi, hazırki dövlət başçısı İlham Əliyev seçkidə qalib gələcək.
ASDP sol təmayüllü müxalifət partiyasıdır. Partiyanın həmsədri Araz Əlizadə, digər həmsədri isə Azərbaycanın eks-prezidenti, hazırda mühacirətdə yaşayan Ayaz Mütəllibovdur.
1991-ci ildə Azərbaycan müstəqilliyini elan etdikdən sonra Mütəllibov ilk prezident seçilib. 1992-ci ildə Xalq Cəbhəsi Hərəkatının hakimiyyətə gəlişindən sonra ölkəni tərk edib, o vaxtdan indiyədək Rusiyada mühacirətdə yaşayır.
Eks-prezident Azərbaycanın Baş Prokurorluğunun ittihamı əsasında beynəlxalq axtarışa verilib. Mütəllibov dövlət çevirilişinə cəhd, qanunsuz silahlı dəstələrin yaradılması, zorla hakimiyyəti ələ almaq və digər ağır cinayətlər törətməkdə günahkar bilinir.
Məqalə müəllifi ilə əlaqə ünvanı: [email protected]
