Azərbaycan, Bakı, 25 avqust / Trend , müxbir E.Babayev/ Azərbaycanda müxalifətin yeni əməkdaşlıq formatında seçkidə iştirakdan imtina edən bütün partiyaların təmsilçiliyi baş tutmayıb. "Danışıqların ilk mərhələsi başa çatmaq üzrədir və hazırda konkret olaraq Azərbaycan Milli İstiqlal Partiyası (AMİP) və Azərbaycan Demokrat Partiyası (ADP) bu danışıqlarda iştirakdan imtina ediblər. Bundan başqa, Vətəndaş Həmrəyliyi və Azərbaycan Sosial Demokrat partiyaları isə ümumiyyətlə, danışıqlara cəlb olunmayıb", bazar ertəsi Trend -a Azərbaycan Xalq Cəbhəsi Partiyasının (AXCP) sədr müavini Fuad Mustafayev bildirib.
Trend -un arayışı: Azərbaycanda prezident seçkiləri oktyabrın 15-də keçiriləcək. Üç müxalifət partiyasının (Xalq Cəbhəsi, Liberal, Vətəndaş və İnkişaf) təmsil olunduğu "Azadlıq" bloku, Klassik Xalq Cəbhəsi, Açıq Cəmiyyət, Müsavat, Vətəndaş Həmrəyliyi, Demokrat, Azadlıq, Milli İstiqlal, Sosial Demokrat partiyaları, o cümlədən "Azərbaycan Naminə" İctimai Forumun rəhbəri Eldar Namazov seçkidə iştirakdan imtina ediblər.
"Azadlıq" blokunun Sədrlər Şurasının ötən həftənin sonu keçirilən toplantısında seçkidə iştirakdan imtina edən partiyaların əməkdaşlıq mərəkəzinin formalaşması barədə qərar verilib. Bu istiqamətdə danışıqlar aparmaq üçün blokun adından AXCP funksioneri Mustafayevə səlahiyyət verilib.
Mustafayevin sözlərinə görə, bu həftə ərzində aparılan danışıqların ilkin mərhələsi açıqlanacaq. O, hazırda hansı partiyaların əməkdaşlığa razılıq verdiklərini isə açıqlamaq istəməyib. Bununla belə, o, Açıq Cəmiyyət və Müsavat partiyalarının əməkdaşlıq formatında təmsilçiliyə razılıq verəcəklərinə işarə vurub. Mustafayev əlavə edib ki, əməkdaşlığın əsas prinsipi seçkilərin qeyri-legitim olduğunun qəbul edilməsi və təsdiq olunmasıdır. Bu məqsədlə danışıqlar aparılan partiyalara sənəd təqdim olunub. Müstafayev onu da deyib ki, danışıqların yekunu olaraq strukturlaşmış hər hansı format yaradılmaya bilər. Danışıqlar nəticəsində birgə siyasi fəaliyyətin əsas detalları müəyyənləşməsi və bu istiqamətdə əməkdaşlıq qurulması mümkündür. Bunlar birgə aksiyaların keçirilməsi, seçki prosesinə vahid münasibət və s. ola bilər.
Məqalə müəllifi ilə əlaqə ünvanı: [email protected]