Azərbaycan, Bakı, 19 noyabr/ Trend , müxbir D.Xatınoğlu/ Əfqanıstan Azərbaycan ilə əməkdaşlığı genişləndirmək niyyətindədir. Əməkdaşlıq perspektivlərinin müzakirəsi məqsədi ilə Əfqanıstanın xarici işlər naziri Ranqin Dadfar Spantanın dekabrın 16-da Bakıya səfəri planlaşdırılır. Bu barədə Trend -a çərşənbə günü telefonla Kabildən nazirin katibi Necm Pur məlumat verib.
Pur bildirib ki, Əfqanıstanın XİN rəhbəri Bakıda Əfqanıstanda sülh və stabilliyin bərqərar olması üzrə əməkdaşlıq, Azərbaycanın Əfqanıstandakı sülhməramlı fəaliyyəti, ölkə iqtisadiyyatına Azərbaycan sərmayələrinin yatırılması imkanlarına dair məsələləri müzakirə etmək niyyətindədir.
Əfqanıstanda təhlükəsizliyə yardım beynəlxalq qüvvələrinin strukturunda 90 Azərbaycan sülhməramlısı var. Onlar Kabildə patrul xidməti həyata keçirirlər.
Məqalə müəllifi ilə əlaqə ünvanı - [email protected]
