Azərbaycanın bir neçə partiyası bələdiyyə seçkiləri ilə bağlı ilk blok təsis edəcək

Azərbaycan, Bakı, 16 iyun / Trend , müxbir A.Hüseynbala / 

Azərbaycanda bələdiyyə seçkiləri ilə bağlı yaradılacaq ilk seçki bloku bu həftə elan oluna bilər.

"Yaradacağımız blokun nizamnaməsini hazırlayıb həftənin sonuna qədər təsis etmək niyyətindəyik", - çərşənbə günü Trend -a yeni yaradılacaq blokun təsisçilərindən biri olan Respublikaçılar Partiyasının sədri Sübut Əsədov bildirib.

Trend -un arayışı: Ötən ay Azərbaycan parlamentində "Bələdiyylərin birləşdirilməsi haqqında" qanun qəbul edilib. 
Qəbul edilən qanuna görə, Azərbaycanda bələdiyyələrin sayı 2757-dən 1766-ya enəcək. 
Azərbaycanda bələdiyyə seçkisi 2009-cu ilin payızında, parlament seçkisi isə 2010-cu ilin payızında keçirilməlidir. Bundan əvvəl iki dəfə - 1999 və 2004-cü illərdə yerli özünüidarəetmə orqanlarına seçkilər keçirilib.

Əsədovun sözlərinə görə, blokun adı ilə də bağlı müzakirələr başa çatmaq üzrədir: "Bir neçə təklif var. Amma blokun təsisçiləri olacaq partiyaların əksəriyyəti yeni seçki blokunun "Demokratik Seçki Mərkəzi" adlandırılmasının tərəfdarıdır", - partiya sədri əlavə edib.

Əsədov deyib ki, bələdiyyə seçkilərində birgə iştirak üçün müzakirələr hazırda Demokratik Azərbaycan Dünyası, Azad Respublikaçıar, Mübarizlər, Milli Demokrat və onun rəhbərlik etdiyi partiyalar arasına aparılır: "Yeni seçki blokunda təmsil olunmaq istəyən bir neçə partiya da var. Amma bloka hansı partiyaların qoşulub-qoşulmayacağı müzakirələrdən sonra bəlli olacaq", - Respublikaçılar Partiyasının sədri vurğulayıb. 

Məqalə müəllifi ilə əlaqə ünvanı: [email protected]