Azərbaycan, Bakı, 24 iyun / Trend , müxbir A.Hüseynbala /
Azərbaycan Parlamentinin komitəsi şadlıq evlərinin lisenziyalaşdırılması səlahiyyətlərinin Mədəniyyət Nazirliyinə verilməsinin tərəfdarıdır.
"Bu problemin həlli üçün "Mərasimlər haqqında" qanunla bağlı "Lisenziyalar haqqında" qanuna əlavə olunmasını təklif edəcəyik", - çərşənbə günü Trend -a Milli Məclisin Sosial siyasət komitəsinin sədri Hadi Rəcəbli bildirib.
Rəcəblinin sözlərinə görə, şadlıq evlərinin fəaliyyəti ilə bağlı problemin yeganə həlli yolu budur: "Şadlıq evi mədəniyyət obyekti olduğundan müğənninin səsi, zalın akustikası və başqa məsələlər nazirliyin nəzarəti ilə tənzimlənməlidir. Bununla bağlı qanuna hər hansı bir maddənin yazılmasına ehtiyac yoxdur", - millət vəkili əlavə edib.
Dini mərasimlərin tənzimlənməsinə gəldikdə, Rəcəbli deyib ki, şəriət qanunlarında bütün problemlərin həlli nəzərdə tutulur. "Əgər bu qanunlara əməl edilərsə, heç bir problemlə üzləşmərik", - komitə sədri vurğulayıb.
Onun fikrincə, Azərbaycanda sosial xidmət institutu yeni formalaşdığından bu sahədəki prosesləri tənzimləyən "Sosial xidmət haqqında" qanun layihəsinin qəbuluna ciddi ehtiyac var. "Xəstəyə xidmət etmək, küçə uşaqları ilə işləmək xüsusi qabiliyyət tələb edir. Bu səbəbdən sosial xidmətlə bağlı mükəmməl qanun layihəsi hazırlayacağıq", - Rəcəbli deyib.
Məqalə müəllifi ilə əlaqə ünvanı: [email protected]