Azərbaycan, Bakı, 29 iyun /Trend, müxbir S.Süleymanov/
ATƏT-in iştirakçı ölkələrinin nazirlərinin əksəriyyəti, daha dəqiq desək, 56 nazirdən 40-sı Almatıda iyulun 16-17-də ATƏT-in iştirakçı ölkələrinin nazirlərinin növbəti qeyri-formal görüşündə iştiraklarını təsdiq ediblər. Bu barədə çərşənbə axşamı mətbuat konfransında ATƏT-in mənzil-qərargahının mətbuat katibi Virciniya Kulondon bildirib.
"Görüşdə 56 ölkənin nümayəndəsi olacaq, bu, səfir və nazir müavinləri səviyyəsində ola bilər. Lakin məhz 40 nazir iştirakını dəqiq bildirib, bununla yanaşı, müraciətlər daxil olmaqda davam edəcək", - Kulondon qeyd edib.
Onun sözlərinə görə, məhz Almatıdakı qeyri-formal görüş ATƏT-in Astanada keçiriləcək qarşıdan gələn sammitinin gündəliyini müəyyən etməyə imkan verəcək.
ATƏT-in mətbuat katibinin sözlərinə görə, hazırda Vyanada ATƏT-in 56 iştirakçı ölkəsinin nümayəndələri ATƏT-in növbəti sammitinin məsələlərini müzakirə edirlər.
"Bütün ölkələr gündəlikdə duran məsələ, ATƏT-in növbəti sammitinin keçirilməsi üçün yer və vaxt barədə yekdil fikrə gəlməlidirlər. Hələlik yalnız bir konsensus var - hamı razıdır ki, 11 illik fasilədən sonra sammit keçirilməlidir və bu baxımdan Qazaxıstanın təklifi bəyənilib, lakin sammitin digər detalları müzakirə mərhələsindədir", - o qeyd edib.
