Azərbaycan, Bakı, 9 sentyabr /Trend, müxbir S.Süleymanov/
ATƏT sammitinin keçiriləcəyi günlərdə Astanaya altı mindən çox qonaq və min beş yüz jurnalist səfər edəcək. Bu barədə cümə axşamı Qazaxıstan Prezidenti Administrasiyası rəhbərinin müavini Maulen Aşimbayev forumun gedişinin işıqlandırılması ilə bağlı Qazaxıstan KİV rəhbərləri ilə iclasında bildirib.
"Postsovet məkanında ilk dəfə olaraq, onbirillik fasilədən sonra, Qazaxıstan paytaxtında ATƏT-in növbəti sammiti keçiriləcək. Orada bu təşkilatın bütün 56 üzv ölkəsi, 500 beynəlxalq QHT nümayəndəsi, altı mindən çox qonaq iştirak edəcək", - Aşimbayev deyib.
Onun sözlərinə görə, ATƏT sammitini işıqlandırmaq üçün Astanaya aparıcı mətbuat və informasiya agentliklərinin min beş yüzdən çox nümayəndəsi gələcək.
"Biz qarşıdakı sammiti yüksək təşkilati səviyyədə keçirməliyik. Bizim üçün bu, ölkəmizə görə fəxr etmək üçün bəhanə, eləcə də qazaxıstanlılar arasında vətənpərvərlik hissinin tərbiyəsi üçün daha bir potensialdır", - Aşimbayev deyib.
Onun məlumatına görə, respublika telekanalları sammitin keçirildiyi günlərdə öz yayım cədvəllərini dəyişəcək.
"Respublikanın "Xəbər", "Qazaxıstan" və digər telekanallarında birbaşa efirdə ATƏT sammiti yayımlanacaq. Bundan başqa, dövlət telekanallarında, eləcə də "Caspionet" kimi kanalda yayım qonaqların rahatlığı üçün ingilis dilində aparılacaq", - Aşimbayev deyib.
Dekabrın 1-2-də Astanada ATƏT-in növbəti sammiti keçiriləcək. Sonuncu dəfə sammit İstanbulda keçirilib.
