Gürcüstan, Tbilisi, 18 noyabr /Trend, müxbir N.Kirsxaliya/
Gürcüstan-Azərbaycan sərhədində yerləşən Erisimedi kəndinin ərazisinin bir hissəsi Azərbaycana veriləcək. Bu barədə cümə axşamı Gürcüstan-Azərbaycan sərhədlərinin delimitasiyası üzrə ikitərərfli hökumətlərarası komissiyadakı etibarlı mənbəyə istinadən Kaxeti İnformasiya Mərkəzi xəbər verib.
Mənbənin məlumatına görə, Azərbaycana veriləcək kəndin bir hissəsində təxminən 30 yaşayış evi, məktəb və ambulatoriya var. Onun sözlərinə görə, ərazi mübadiləsi ilə bağlı danışıqlar aparılmır.
Erisimedidə əsasən Acarıstandan köçürülən əməkçi miqrantlar yaşayır. Yerli sakinlərin Kaxeti İnformasiya Mərkəzinə dediklərinə görə, cari ilin yazında Gürcüstan hökuməti yalnız əhalinin bir qismi üçün mülkiyyət hüququnu rəsmiləşdirib.
"Bizə deyirlər ki, mübahisəli ərazidə yaşayırsınız və buna görə, onlar evləri rəsmiləşdirmirlər. Bu yaxınlarda öyrəndik ki, kəndin bir hissəsi Azərbaycan ərazisində tikilib və bizm Azərbaycan ərazisində qalacağımız və ya köçürüləcəyimiz hələ ki bilinmir. Tələb edirik ki, Gürcüstan Xarici İşlər Nazirliyi real vəziyyətin necə olduğunu aydınlaşdırsın", - Erisimedi sakinləri qeyd edib.
Hazırda Erisimedi kəndi rəsmən Siqnax rayonunun tərkibinə daxildir və Gürcüstanın yurisdiksiyasındadır. Lakin kəndə təxmin 1 km-də yerləşən Gürcüstan Sərhəd Polisinin postunda qeydiyyatdan keçmədən daxil olmaq qeyri-mümkündür. Sərhədçilərin sözlərinə görə, kəndin yarısı mübahisəli ərazidədir, buna görə Erisimediyə daxil olmaq üçün qeydiyyatdan keçmək tələb olunur.
