...

İlham Əliyev MDB Təhlükəsizlik və Xüsusi Xidmət Orqanları Rəhbərləri Şurasının nümayəndələrini qəbul edib (ƏLAVƏ OLUNUB)

Siyasət Materials 27 Oktyabr 2011 19:26 (UTC +04:00)
Cümə axşamı Azərbaycan Prezidenti İlham Əliyev MDB-nin üzvü olan dövlətlərin Təhlükəsizlik və Xüsusi Xidmət Orqanları Rəhbərləri Şurasının Bakıda keçirilən XXXI iclasında iştirak edən nümayəndə heyətini qəbul edib.
İlham Əliyev MDB Təhlükəsizlik və Xüsusi Xidmət Orqanları Rəhbərləri Şurasının nümayəndələrini qəbul edib (ƏLAVƏ OLUNUB)

Təfərrüatlar əlavə olunub (ilk xəbər saat 17:43-də yayılıb)

Azərbaycan, Bakı, 27 oktyabr /Trend/

Cümə axşamı Azərbaycan Prezidenti İlham Əliyev MDB-nin üzvü olan dövlətlərin Təhlükəsizlik və Xüsusi Xidmət Orqanları Rəhbərləri Şurasının Bakıda keçirilən XXXI iclasında iştirak edən nümayəndə heyətini qəbul edib.

Azərbaycan dövlətinin başçısı İlham Əliyev qonaqları salamlayaraq deyib:

- Xoş gəlmisiniz! Sizi Azərbaycanda salamlamağa şadam. Ümid edirəm ki, MDB ölkələrinin Təhlükəsizlik və Xüsusi Xidmət Orqanları Rəhbərləri Şurasının iclası uğurla, əməkdaşlıq, qarşılıqlı fəaliyyət ruhunda keçəcəkdir.

Bildiyiniz kimi, bizim ölkə ilə sizin təmsil etdiyiniz ölkələr arasında olduqca mehriban dostluq münasibətləri yaranıb. Biz müntəzəm olaraq dövlət başçıları səviyyəsində görüşürük, qarşılıqlı səfərlər edirik, bir çox mühüm məsələləri həll edirik. Bütün bunlar isə postsovet məkanında çox yüksək səviyyədə qarşılıqlı fəaliyyətə və qarşılıqlı dəstəyə təkan verir. Sovet İttifaqı dağıldıqdan sonra keçən 20 il ərzində əldə etdiyimiz ən böyük nailiyyət odur ki, biz xalqlarımız və ölkələrimiz arasında dostluq münasibətlərini qoruyub saxlaya və möhkəmləndirə bilmişik.

MDB çərçivəsində keçirilən müxtəlif görüşlərin, tədbirlərin ölkələr arasında əməkdaşlığın genişlənməsi üçün yaxşı perspektivlər yaratdığını qeyd edən Prezident İlham Əliyev humanitar sahədə də əlaqələrin möhkəmləndiyini vurğulayıb. Dövlətimizin başçısı buna misal olaraq bu yaxınlarda Bakıda MDB ölkələrinin də iştirakı ilə keçirilən Birinci Beynəlxalq Humanitar Forumun bütün dünyada böyük maraq doğurduğunu diqqətə çatdırıb.

Prezident İlham Əliyev MDB ölkələri arasında iqtisadi əlaqələrə və xüsusi xidmət orqanlarının əməkdaşlığına da toxunaraq deyib:

- İqtisadi strukturlar xətti üzrə də əlaqələrimiz inkişaf edir. Azərbaycana gəlincə, bizim MDB ölkələri ilə əmtəə dövriyyəsi, qarşılıqlı investisiyalar artımı mövcuddur. Biz iqtisadi sahədə mövcud münasibətlərdən razıyıq. Hüquq mühafizə orqanları xətti üzrə də, həmçinin bizim regionda ikitərəfli və çoxtərəfli səviyyədə sərhədlərin mühafizəsi, cinayətkarlıqla mübarizə və əlbəttə ki, xüsusi xidmət orqanları xətti ilə ən böyük təhlükələrlə mübarizə istiqamətində sıx əməkdaşlıq edirik.

"Biz hamımız maraqlıyıq ki, ölkələrimizdə sülh, əmin-amanlıq, inkişaf hökm sürsün. Qarşımızda vətəndaşlarımızın həyat səviyyəsini, rifahını daha da yaxşılaşdırmaq kimi böyük vəzifələr durur", - deyən Prezident İlham Əliyev bütün bu məqsədlərə əngəl olan terrorizm və ekstremizmə qarşı birgə mübarizənin əhəmiyyətini qeyd edib. Dövlətimizin başçısı bu baxımdan xüsusi xidmət orqanlarının üzərinə düşən vəzifələrdən danışıb.

Prezident İlham Əliyev MDB-nin üzvü olan ölkələrin təhlükəsizlik və xüsusi xidmət orqanları rəhbərləri Şurasının Bakıda keçirilən XXXI iclasının işinə uğurlar arzulayaraq bildirib:

- Əminəm ki, Şuranın iclası uğurlu keçəcək, siz gündəlikdə duran bütün məsələləri müzakirə edəcəksiniz. Həmçinin düşünürəm ki, Bakıda keçirəcəyiniz bu iki gün sizi daha da yaxınlaşdıracaq, birgə iş üçün daha yaxşı şərait yaradacaqdır. Sizi bir daha salamlayır və Şuranın işinə uğurlar arzulayıram.

MDB-nin üzvü olan dövlətlərin Təhlükəsizlik və Xüsusi Xidmət Orqanları Rəhbərləri Şurasının sədri, Rusiya Federasiyası Federal Təhlükəsizlik Xidmətinin direktoru Aleksandr Bortnikov Şuranın XXXI iclasının Bakıda yüksək səviyyədə keçirilməsinə yaradılan imkana və nümayəndə heyəti ilə görüşə görə Azərbaycan Prezidenti İlham Əliyevə tədbir iştirakçıları adından minnətdarlığını bildirib. O, MDB-nin üzvü olan dövlətlərin təhlükəsizlik və xüsusi xidmət orqanlarının uğurla birgə əməkdaşlıq etdiklərini, beynəlxalq terrorizm, ekstremizm və digər ümumi təhlükələrə qarşı mübarizədə səyləri birləşdirdiklərini vurğulayıb.

Aleksandr Bortnikov bildirib ki, məhz ötən 20 ildə MDB məkanında təhlükəsizlik və xüsusi xidmət orqanlarının uğurlu birgə fəaliyyəti nəticəsində belə təhlükələrin qarşısı vaxtında alınır və səmərəli qabaqlayıcı tədbirlər həyata keçirilir. Qonaq qeyd edib ki, Şuranın XXXI iclasında ötən müddətdə görülən işlərə yekun vurulacaq və növbəti birgə tədbirlər müəyyənləşdiriləcək. O, son illərdə informasiya-kommunikasiya texnologiyaları və ən son elmi-texniki yeniliklərdən istifadə etməklə terrorizm, ekstremizm və digər təhlükələrin miqyasının daha artdığını bildirib və buna qarşı mübarizədə daha sıx birgə fəaliyyət göstərməyin zəruriliyini diqqətə çatdırıb. Aleksandr Bortnikov onları qəbul etdiyinə və MDB-nin üzvü olan dövlətlərin Təhlükəsizlik və Xüsusi Xidmət Orqanları Rəhbərləri Şurasının XXXI iclasının Bakıda yüksək səviyyədə təşkilinə yaratdığı imkana görə dövlətimizin başçısına bir daha minnətdarlığını bildirib.

Qonaq nümayəndə heyətləri rəhbərləri adından Prezident İlham Əliyevə xatirə hədiyyəsi təqdim edib.

Sonra xatirə şəkli çəkdirilib.

Xəbər lenti

Xəbər lenti