...

İranda keçiriləcək parlament seçkilərində əhali aktiv iştirak etməyəcək – ekspertlər

Siyasət Materials 29 Fevral 2012 17:50 (UTC +04:00)

Trend-i buradan izləyin

Azərbaycan, Bakı, 29 fevral /Trend, müxbir T.Cəfərov/

Müxtəlif sorğular aparan İran KİV-ləri martın 2-də keçiriləcək IX çağırış parlament seçkilərində əhalinin aktivliyinin 60-65 faiz təşkil edəcəyini açıqlayıblar, lakin ekspertlər hesab edir ki, seçkilərdə əhalinin aktivliyi daha aşağı olacaq.

"İslahatçıların seçkilərə qatılmaması, əhalinin prezident seçkilərindən sonrakı hadisələrə görə dövlətə etimadsızlığı, hakim Mühafizəkarlar düşərgəsində cinahlar arasındakı ixtilaf göstərir ki, budəfəki seçkilərdə əhalinin aktivliyi ölkə üzrə 30-35 faiz təşkil edəcək", - Almaniyada fəaliyyət göstərən iranlı politoloq Həsən Şəriətmədari çərşənbə günü Trend-ə bildirib.

Martın 1-də namizədliyini irəli sürmüş 3444 nəfərin seçki kampaniyası başa çatır. İranın "Fars" xəbər agentliyinin məlumatına əsasən, 2012-ci il mart ayının 2-də İranda keçiriləcək IX çağırış parlament seçkilərində əhalinin 60-65 faizi iştirak edəcək, digər İran saytları isə bu rəqəmin 55-60 faiz təşkil edəcəyini bildiriblər. İranın ali lideri Ayətullah Əli Xamneyi fevralın 29-da çıxış edərək əhalini cümə günü keçiriləcək parlament seçkilərində aktiv iştirak etməyə çağırıb. O, bu seçkilərin digər seçkilərdən daha həssas olduğunu vurğulayıb.

Şəriətmədari əhalinin seçkilərdə aktivliyini müəyyənləşdirməkdə əsas problemlərdən biri kimi İranda sorğu apara biləcək bitərəf müəssisələrin olmamasını və əhalinin təhlükəsizlik məsələlərinə görə öz fikirlərini şəffaf açıqlamamasını göstərib.

İran parlamentinin sabiq deputatı və daxili məsələlər üzrə ekspert Əli Məzrui də seçkilərdə əhalinin aktivliyinin ötən seçkilərlə müqayisədə daha az olacağı qənaətindədir.

"Seçkilərdə əhalinin aktivliyini müəyyənləşdirmək çətindir. Lakin VII və VIII çağırış parlament seçkilərində rəsmi statistika 51 faiz təşkil etdiyi üçün, düşünürəm ki, bu seçkilərdə əhalinin aktivliyi daha az olacaq. Bundan başqa, İslahatçıların tərəfdarları da bu seçkilərdə iştirak etməyəcək", - Məzrui Trend-ə müsahibəsində deyib.

Şəriətmədari qeyd edib ki, gələcək parlament seçkilərinin nəticəsi olaraq, parlamentdəki kürsülər ali lider Ayətullah Əli Xamneyinin və Prezident Mahmud Əhmədinejadın tərəfdarları (namizədliyini irəli sürmüş) arasında bölüşdürüləcək.

"Budəfəki seçkilərdə Daxili İşlər Nazirliyi hökumətin və Nəzarət Şurası isə Ayətullah Xamneyinin tərəfdarlarının əlindədir. Bu, hər iki qrupun parlamentdəki kürsülərə Üsulgəralar düşərgəsindən daha çox sahib olacağını deməyə əsas verir", - o deyib.

Şəriətmədari Üsulgəraların iki böyük cinahı arasında gərginlik yaşanmasın deyə, "razılaşdırılmış siyahı"nın təqdim olunmasını da istisna etməyib.

İranda keçiriləcək qarşıdakı seçkilərdə əsas rəqiblər İslahatçılar və Mühafizəkarlar (Üsulgəralar) düşərgələridir. Lakin İranın müxalifyönlü KİV-lərinin məlumatına əsasən, İslahatçılar düşərgəsindən bəzi partiyalar, qruplar və şəxslər seçkilərdə iştirak etməyəcəklərini bildiriblər. Mühafizəkarlar isə təkcə paytaxt Tehrandan beş müxtəlif cəbhəyə ayrılaraq gələcək parlament seçkilərinə qatılacaqlar.

Şəriətmədari seçkilərə İslahatçılardan namizədliyini irəli sürmüş şəxsləri əsl islahatçı deyil, vəziyyətdən öz mənafeləri naminə su-istifadə edənlər adlandırıb.

"İslahatçıların rəhbərləri və tanınmış şəxsiyyətləri seçkilərdə iştirak etmir və bunu xalq çox yaxşı bilir. Bir neçə nəfər özlərini islahatçı adlandıran şəxs iştirak edir ki, bu da çox əhəmiyyətli deyil", - Məzrui deyib.

Xəbər lenti

Xəbər lenti