Azərbaycan, Bakı, 18 iyul /Trend/
Suriya müxalifəti son həftələrdə xeyli silah əldə edib. Trend-in RİA Novosti-yə istinadən verdiyi məlumata görə, bunu ABŞ-ın dövlət katibi Con Kerri deyib.
Kerri bəyan edib: "Bildiyim qədərilə son həftələr ərzində əhəmiyyətli sayda müxtəlif növ silah-sursat Suriya müxalifətinə çatıb".
Yalnız "Suriyanın dostları" qrupunu qeyd edən dövlət katibi söhbətin məhz hansı tədarükdən getdiyini dəqiqləşdirməyib.
Onun sözlərinə görə, ABŞ-da hərbi yardım üzrə qərarın qəbul edilməsi gözləniləndən çox vaxt tələb edir. Kerri xatırladıb ki, bu qərar Konqresdən keçməlidir.
Dövlət katibi, eyni zamanda, münaqişənin siyasi yolla nizamlanacağına ümid etdiyini bildirib: "Biz hələ də inanırıq ki, dərhal danışıqlar masası arxasında əyləşmək, zorakılığa son qoymaq və keçid hökuməti istiqamətində hərəkət etmək lazımdır".