ABŞ Şimali Koreyaya qarşı həm Rusiya və Çin şirkətlərinə təsir edə biləcək sərt sanksiyalar paketi hazırlayıb. Lakin onların tətbiqi ABŞ prezidenti Donald Trump və KXDR lideri Kim Çen In arasında nəzərdə tutulan görüş haqqında Vaşinqtonda və Pxenyan arasında davam edən danışıqlar nəticəsində ləngiyə bilər, bu haqda Trend TASS-a istinadən xəbər verir.
Məlumatlara görə, ABŞ Maliyyə Nazirliyi xaricdən KXDR vəsait gəlirlərinin miqyasını azaltmaq üçün, Rusiya və Çin şirkətləri daxil olmaqla, 30-dan çox şirkətə qarşı yönəlmiş sanksiyalar paketi hazırlayıb. Ağ ev çərşənbə axşamı sanksiyaları tətbiq ediləcəyini açıqlaya bilər, ancaq bu məsələnin təxirə salınacağı gözlənilir.
Ötən həftə ABŞ prezidenti Şimali Koreya liderinə görüşün baş tuta bilməməsi haqda xəbər yolladı. İsmarıcda Pxenyanın düşmən sayağı neqativ bəyanatları ucbatından bu görüşün mümkünsüz olduğu söylənirdi. Ancaq Trump görüşün başqa tarixdə keçiriləcəyini istisna etmirdi və mayın 25-i hər halda Şimali Koreya lideri ilə iyunun 12-də Sinqapurda görüşün baş tutacağını ehtimal etdi.
Keçən həftə ABŞ rəsmiləri liderlər arasında görüşün baş tutmayacağı təqdirdə Pxenyana qarşı sanksiyaların gücləndirilməsinin vacibliyini açıqladı. "Məqsəd maksimal təzyiqin göstərilməsidir", - ABŞ administrasiyasının yüksək vəzifəli nümayəndəsinin sözlərinə görə, "biz hələ buna nail ola bilməmişik".