Azərbaycan, Bakı, 31 mart/ Trend , müxbir İ.Əlizadə/ Azərbaycanın bir qrup jurnalisti Kəlbəcər rayonunun Ermənistan tərəfindən işğal olunmasının ildönümü ilə bağlı aprel ayının 2-də BMT-nin Bakı nümayəndəliyi qarşısında icazəsiz etiraz aksiyası keçirəcək. "Bakı Şəhər İcra Hakimiyyəti Kəlbəcər rayonunun Ermənistan Silahlı Qüvvələri tərəfindən işğal olunmasının 15-ci ildönümü ilə bağlı BMT-nin Bakı nümayəndəliyi qarşısında etiraz piketi keçirməyimizə icazə verməyib. Buna baxmayaraq, biz aksiyanı təxirə salmayacağıq və aprelin 2-də, saat 12.00-da BMT-nin Bakı nümayəndəliyi qarşısında piket keçirəcəyik", - deyə bazar ertəsi Trend a açıqlamasında təşkilatçılardan biri, Parlament Jurnalistləri Birliyinin sədri Elşad Eyvazlı bildirib.
Azərbaycanın Kəlbəcər rayonu 1993-cü il aprelin 2-də Ermənistan tərəfindən işğal olunub. Kəlbəcərin ərazisinin sahəsi 1936 kv.km, əhalisinin sayı isə 70 minə yaxındır. Rayon sakinləri hazırda Azərbaycanın 59 rayonunda məskunlaşıb.
Kəlbəcərin işğalından sonra 3205 saylı iclasında BMT Təhlükəsizlik Şurası 822 saylı Qətnamə qəbul edib. Qətnamədə bütün işğalçı qüvvələrin Kəlbəcər və Azərbaycanın digər işğal olunmuş rayonlarından dərhal çıxarılması tələb olunur. Lakin indiyədək həmin Qətnamədən irəli gələn hər hansı öhdəlik yerinə yetirilməyib. Sonradan BMT Təhlükəsizlik Şurası Ağdam rayonunun azad edilməsi ilə bağlı 854-cü, Füzili rayonunun azad edilməsi ilə bağlı 874-cü və digər işğal edilmiş rayonların azad edilməsi ilə bağlı 884-cü qətnamələri qəbul edib, lakin həmin qətnamələr kağız parçası olaraq qalmaqdadır.
"Bakı Şəhər İcra Hakimiyyətinin cavab məktubunda qeyd olunub ki, Ermənistanın Azərbaycana qarşı təcavüzünə qarşı bizim barışmaz münasibətimizi təqdirəlayiq hal hesab edirlər. Məktubda qeyd olunub ki, "Sərbəst toplaşmaq azadlığı haqqında" qanunun 9-cu maddəsinin ücüncü hissəsinin birinci bəndinə əsasən, qanunvericilik, icra və məhkəmə orqanlarının yerləşdiyi binaların 300 metirliyində yığıncaq, mitinq və nümayişlərin keçirilməsi qadağandır. Cavab məktubunda bizə məsləhət görürlər ki, məsələyə etirazımızı sivil qaydada bildirək. Lakin biz bununla razı deyilik ", - deyə Eyvazlı bildirib.
Onun sözlərinə görə, piketə xeyli sayda jurnalist dəstək verir və aksiyada 50 nəfərin iştirakı nəzərdə tutulub.
"Hesab edirik ki, BMT Təhlükəsizlik Şurası ya öz gücsüzlüyünü, ya da Qarabağ proleminin ədalətli həllinin tərəfdarı olmadığını etiraf etməlidir.Aksiyada bu tələblər irəli sürülücək", - deyə Eyvazlı əlavə edib.
Ermənistan Azərbaycan ərazisinin 20 faizini - Dağlıq Qarabağı və ətrafındakı yeddi rayonu işğal edib. İşğal 1988-ci ildən başlayıb, 1991-ci ilin dekabrınadək Şuşa və Xocalı istisna olmaqla Dağlıq Qarabağ Azərbaycanın nəzarətindən çıxıb. 1992-93-cü illərdə isə Şuşa, Xocalı və Dağlıq Qarabağın ətrafındakı daha yeddi rayon işğal edilib. 1994-cü ildə Ermənistanla Azərbaycan arasında atəşkəs haqqında razılıq əldə olunub və indiyədək də tərəflər arasında sülh danışıqları davam etdirilir.
Dağlıq Qarabağ münaqişəsinin sülh yolu ilə tənzimlənməsi üçün üç ölkə - ABŞ, Rusiya və Fransa təmsilçilərinin həmsədrliyi ilə ATƏT-in Minsk qrupu vasitəçilik edir.
