Azərbaycan, Bakı, 13 may / Trend , müxbir R.Ergün/ Bakıda keçiriləcək bilyard üzrə Avropa çempionatının (AÇ) iştirakçıları məlum olub. Bu barədə Trend -a çərşənbə axşamı Azərbaycan Bilyard İdmanı Federasiyasının (ABİF) mətbuat xidməti məlumat verib.
Bilyard üzrə Avropa çempionatında 10 ölkənin - Azərbaycan, Belarus, Gürcüstan, Almaniya, Latviya, Litva, Moldova, Rusiya, Ukrayna və Finlandiyanın təmsilçiləri iştirak edəcəklər.
Bilyard üzrə Avropa çempionatında Azərbaycanın şərəfini Seymur Məmmədov, Azər Hacıyev və Ceyhun Ağayev qoruyacaq. Azərbaycanın ehtiyat yığma komandasının tərkibində Rauf Mustafayev, Niyazi Xələfov, Aqşin Ələsgərov və Yəhya Məmmədov iştirak edir.
Çempionatın əsas partnyoru "PuptuP", partnyorları "Statoil Hydro", "RASSON" və "Belwest" şirkətləridir.
Bilyard üzrə Avropa çempionatının oyunları Bakı Olimpiya Mərkəzində keçiriləcək. Çempionatın rəsmi açılışı mayın 15-də saat 17.00-da olacaq.
Avropa çempionatında 32 kişi, 16 qadın idmançı iştirak edəcək. Birincilik mayın 18-də başa çatacaq.
Məqalə müəllifi ilə əlaqə ünvanı: [email protected]